Kya tha zara si dair mein kya ho gaya koii
Do din juda raha to naya ho gaya koii
Wo bhi mujhay azeez tha mein bhi usay azeez
Phir jaanay kya hua kay khafa ho gaya koii
Meri nazar nay us ko khad-o khaal day diye
Zehra jamaal-e sheh'r-e saba ho gaya koii
Mehfil mein tha to chaand ki soorat sabeh tha
Tanha mila to rung-e hina ho gaya koii
Is khush'ada guraiz kay qurbaan jaaiye
Mujh ko salam kar kay hawa ho gaya koii
Ilzaam hum pay aaya hum musta'id na thay
Jab bhi kisi ka teer khata ho gaya koii
Mujh jaisay be'nawa ko nawaza ba'sad khuloos
Yoon bhi bara tha aur bara ho gaya koii
No comments:
Post a Comment